Sunday, September 30, 2007

رثاء الدهشة - قصيدة من داليا زيادة



عندما تجتمع الأحداث الغريبة أمام أعيننا، نندهش .. تتكاثر الغرائب، فنزداد دهشة .. تتضاعف الأشياء المدهشة، فنفقد قدرتنا على الدهشة .. و حين نفقدها ندرك أنها كانت أجمل ما فينا .. فنرثيها


رثاء الدهشة

داليا زيادة


على رغم علمي


إن السما حاضنة القمر


و غنوة الحب الأثيرة


بين شمس بلدي و الشجر


و محاولات فشلي الكتيرة


في امتلاك حبة مطر


إحساسي بالدهشة أتقتل


و كياني أصبح ع الحياد


الفرح ساوى الزعل


والكلام زي السكات


وقلبي حجر .. زي القمر


باسم لكنه غير سعيد


لما السحاب غيم بظلمه ع الشجر


و داري نور شمسه بعيد


أنا كنت موجة وسط بحر


تايهة و قلبي بيرتجف لكن عنيد


أنا كنت عطر لوردة حان ليها الأجل


فأجبروها على اختزال


كل أحداث الحياة ف صفحة فشل!


صحيح لساني لسه قادر ع الكلام


بعشق و بحلم و احترفت الابتسام


لكن خسرت اللي يخليني بشر:


إحساسي بالدهشة اتقتل!