Thursday, July 21, 2011

الليبرالية مش عيب.. الليبرالية مش كفر



الليبرالية.. مشكلة المشاكل الأيام دي، خصوصاً لما كل شوية يطلع شيخ يشتم في الليبرالين ويكفرهم ويحرض الناس ضدهم .. أخرهم الشيخ زغلول النجار ال بمنتهى البساطة أدعى النهاردة إن الليبرالية كفر، أنا مش فاهمة ليه الناس بتخلط الليبرالية ال هي مذهب سياسي واقتصادي بالدين ال هو عقيدة بتختلف من إنسان لآخر وبتشكل علاقته بربنا ومرجعيته الأخلاقية في الناس من حواليه؟ لو كانت بعض الجماعات السياسية زي الأخوان المسلمين مثلا أعطت لنفسها الحق لإقحام الدين في السياسة فده مش معناه أنهم صح وإن السياسة مكانها الطبيعي في الدين والدين مكانه الطبيعي في السياسة، هم عملوا حاجة غلط لأنهم انتهكوا قدسية الدين بأنهم يقارنوه بمذهب سياسي وفي نفس الوقت اعطوا للسياسة قدسية زائفة

فيا ريت.. أرجوكم يا مصريين ما حدش يربط بين الكفر والأيمان وأي مذهب سياسي تاني

نرجع لليبرالية، الليبرالية في أبسط معانيها هي الأيمان بالحب والحرية والسلام والشفافية كأساس للتعايش بين أفراد المجتمع، وإعلاء قيمة الفرد وضمان حريته في إطار القانون العام للدولة ال يتفق عليه كل الطوائف في المجتمع على أختلافها سواء الديني أو السياسي أو غيره.. قانون مدني يعني.. وبناءاً عليه من خلال إعلاء قيمة الفرد ومنحه كامل حقوقه سيتم الارتقاء بالمجتمع باعتبار الفرد هو المكون الاساسي للمجتمع ده، زي مثلاً الطوب في جدار، لو الطوب معمول من خامة كويسة وبيتم رعايته وصيانته باستمرار الجدار هيفضل سليم، لكن لو طوبة واحدة بس في الجدار مش سليمة الجدار كله هيقع

الليبرالية يعني الشفافية، يعني حكومة تحترمك وكل ال بيشتغلوا فيها يبقوا فاهمين أنهم موجودين لخدمتك مش عشان يذلوك، الليبرالية يعني كل إنسان يحترم القانون ال بيحكم مجتمعه ويكون له صوت وحق في الاختيار وصناعة القرار بالتساوي مع باقي الأفراد في المجتمع

الليبرالية يعني الحرية، تكره أنك تكون حر؟ مش ربنا خلقك حر؟ لو بتحب ربنا لازم تحافظ على الحرية ال اداها لك  وتقدرها وتشكره بأنك تستغلها في ال يخدم بلدك وينميها من خلال تنمية نفسك وإنجاحها

هي دي الليبرالية من وجهة نظري